رحمةُ الله وبركاتهُ أهل الثوره

منذ عام علق جيراني المسيحيين هذه الشاره علي جدار منزلهم ’’حداد ولا نقبل تهاني‘‘ كنت قد أُولمت أيُما الألم علي ما حدث عشيه رأس السنه وقد فاض بي و بغيري الكيل من نظام عبثي نحيا فيه ونرفضه بداخلنا فقط اللهم الا من بعض من قالو لا هنا أو هناك في حين أن الأغلب من المعذبين كان يتلفح بصمته

التاريخ 6 يناير 2011

منذ عام سمعت عن موت شاب سلفي يدعي سيد بلال علي خلفيه تفجيرات الأسكندريه, خبر أثار شديد غضبي فلم أكن أعرف وقتها أذا كان هو الفاعل أم لا ولكنه كائن أشاركه الأنسانيه وأن كنا تعودنا علي فقد أنسان هنا أو هناك تحت وطأه تعذيب , ألم تعوّدت عليه

http://ar.wikipedia.org/wiki/%D8%B3%D9%8A%D8%AF_%D8%A8%D9%84%D8%A7%D9%84التاريخ 6 يناير 2011

منذ عام وفي خضم أحداث ومشاهدات كئيبه  من الداخل, متراكمه مع السنين أوصفعات حديثه, لم تكن أبداً لتلهينا عن شهيد الكرامه الكريم “طارق الطيب محمد البوعزيزي” أو “بو عزيزي” البسيط صاحب أعلي صرخه للحريه الذي أضاء بجسده للشعوب العربيه كي تعبر خلفه للحريه التي وهبها نفسه

التاريخ 6 يناير2011

هم علامات فارقه أكدوا لي أن تقديم عمري في يوم 28 يناير خير من أبقي حبيس وطني

رحمةُ الله وبركاتهُ أهل الثوره

طِلْع الصَبَاحْ

الدنيا خيرهها وعزها للشقيانين

يسعد صباحكم كلكم .. يا شغالين

 

إنتهاكات

التسمية إنتهاكات
الحقيقة الإنتخابات لم تكن الخيار الأفضل علي أرض الواقع بس الحقيقة الأكبر هو عوج المسار وهو ليس موضوعنا ولكم ما أن وجدت فقد عقدت عزمي علي أن أخذ بالإتجاهين ثوره مستمره و التمسك بشرعيه ما وافق عليه الشعب المصري سابقا  خاصه أني كنت واحد من 77% من الكتله التي صوتت ب (نعم) في إستفتاء 19 مارس وضمنيا وافقت علي أنتخابات نيابيه في شهر سبتمبر (وليس نوفمبر كما هو الحال) المهم وحسب متابعتي للأخبار و التدوينات القصيرة علي تويتر والمواقع الحقوقية فأنه لم ترصد وقائع تزوير بشكل مباشر ولكن انتهاكات كثيره للقوانين الأنتخابيه و مواثيق الشرف من إنتهاك فتره الصمت و الدعاية الأنتخابيه علي أبواب اللجان و غيرها و هي ما تؤثر بشكل الي حد ما ليس بكبير علي النتيجة وهو ما وضح في تفوق الأرقام الأولية لحزب الحريه والعداله عن جميع منافسيه الأهم و هو ما قصدت به هذه التدوينه أن أسجل أن التكتلين الإسلاميين الاكبر الحريه و العدالة و حزب النور كانو الأكثر أنتهاكاً لقوانين الإنتخابات  في المرحله الأولي و هذه النتيجه مبنيه كما قلت علي وقائع مسجله
الخلاصة أن الإنتهاكات جاءت من المجلس العسكري أولا حين لم يلتزم بميعاد الإنتخابات كما نص عليه في الإعلان الدستوري ومره أخري حين لم ينقي الوسط السياسي من مفسديه فلول الحزب الوطني.
الانتهاكات جاءت من احزاب التيار الديني حين حشدت لها الشارع بأسم الدين ومن الكنيسه حين وجهت أولادها لإختيار حزب المصريين الاحرار للحفاظ علي هويه مصر المدنية
الإنتهاكات جاءت حين لم تلتزم الكتل و الاحزاب و الافراد المتنافسة بالقوانين الخاصه بالدعاية الأنتخابيه
الأنتهاكات طالت الجميع و لكن أختلفت النسب

مراقبه أنتخابات مجلس الشعب

أيه هي مراقبه عمليه الأنتخاب ؟

   هي عمليه ملاحظه العمليه الأنتخابيه في جميع مراحلها بدايه من الأبلاغ عن تجاوزات في محيط اللجنه الي سير العمليه ذاتها داخل اللجنه

  أيه هي التجاوزات اللي ممكن رصدها ؟

منعت من دخول اللجنه
دخلت ومنعت من التصويت
وجود أعمال بلطجه خارج اللجنه او محاولات شراء أصوات
دخلت وواحد من العاملين باللجنه حاول ان يأثر علي صوتك اويوجهك لرأي معين
القاضي قالك هات الورقه ومشفتوهوش حطها في الصندوق
الورقه ماكنتش مختومه
خرجت من غير ما تحط صباعك في الحبر الفسفوري
ألخ من الامور الغير طبيعيه او المريبه او اي شئ تشك فيه بس اسأل الاول علشان متعملش بلبله عل فاضي

طيب أبلغ مين ؟

(I)
المجلس القومي لحقوق الأنسان
وللأختصار و التسهيل دي الأرقام بتاعتهم
موبايل
01020339340 – 01020339341- 01020339342 – 01020339343 – 01020339344 – 01020339345 – 01020339346 – 01020339347- 01020339348 – 01020339349-01020339365 – 01020339366 – 01020339367 – 01020339368 – 01020339369 – 01020339371 – 01020339372 – 01020339373 – 01020339374 – 01020339375
أرضي
37624382 – 37624398 – 37624831
 أرقام الفاكس
37624782 – 37624229
  SMS رسائل نصيه قصيره
01020339370
(II)
U-shahid
http://www.u-shahid.com/egyelection/reports/submit
أكتب رساله عل موقع بكافه التفاصيل اللي أنت شفتها
ٍرساله نصيه علي 012 7 2222452
لو بتستخدم تويتر يبقي حتستخدم الهاش تاج دا  #ushahid
ودا الأكونت https://twitter.com/u_shahid
(III)
حتلاقي النشطاء والصحفيين وممثلين المجتمع المدني واتأكد انه مصرح ليه بمراقبه العمليه الانتخابيه الاول (حيكون معاه تصريح بكدا) بس مشكله الحل دا انه مش حتلاقي الناس دي في كل لجنه. يستحسن كمان لو شفت اي تجاوز انك تصوره
ماتنساش أنك ممكن  تبلغ رئيس اللجنة الفرعية، أو رئيس وأعضاء اللجنة العامة، أو ممثل اللجنة القضائية العليا بالمحافظة، أو اللجنة القضائية العليا،  أو مكتب النائب العام، أو قسم الشرطة بعمل محضر رسمي

تامر بتاع القوات المسلحه

تامر: هما طالبين اني أرجع دلوقتي وحدتي (شخره) وانا طبعا رافض أني أنا أرجع أنا موجود مع الثوره لحد ما تنتهي

طبعا هي مش مقصوده بس الصدفه الغريبه أن شخره تيجي في الفيديو (د 4.11) و في مكانها بالظبط ..أي صدفه هذه !!🙂 أنا بضم صوتي لصوت تامر و بشخر للمجلس العسكري

ملحوظه علي جنب: حتي لو خرج المجلس العسكري يقول أن تامر مش أبنائه بس تبقي الشخره خالده🙂

أحنا اللي علمنا عل داخليه

في الذكري الأولي لشهيد الحريه خالد سعيد من امام وزاره الداخليه

This slideshow requires JavaScript.

أنا نازل بكره التحرير

أنا نازل بكره التحرير أيوه انا نازل بكره التحرير فعلا ان نازل بكره التحرير

أنا مش نازل جمعه الغضب التانيه أيوه أنا مش نازل جمعه الغضب التانيه فعلا أنا مش نازل جمعه الغضب التانيه

أنا نازل أقول طلباتي وبس أنا مش نازل أصطدم بحد أيوه أنا نازل أقول طلباتي وبس أنا مش نازل أصطدم بحد فعلا أنا نازل أقول طلباتي وبس أنا مش نازل أصطدم بحد

ليه أنا لازم أكررلك كلامي علشان تصدق هو أنت مش بتصدق فيا أني بعمل الصح..فاكر لما وقفت تتفرج عليا وأنا نازل يوم 25 و 26 و27 و28 يناير وانت مش مهتم بالي انا بعمله وقلت مش حيجيب نتيجه ؟ طب فاكر لما كنا ببنزل يوم الجمعه علشان الثوره تكمل ونشاور للمجلس العسكري علي اللي متأخر فيه ويقوم هو عمله ساعتها كنت بتقولي انت طلعت صح ؟..فاكر ولسه بتشوف الأضرابات العماليه بتجيب نتيجه وتحسن أوضاعهم أو علي الأقل حتحسنها قي المستقبل وانت بتقول فئويه وبعدين انا أطلع صح , صح؟

طيب ليه المره دي شاكك في نيتي ورافض تصرفي ؟ قريت مقال بلال فضل النهارده ؟ هو الراجل أختصر عليا كتير خد المقال اهه .ولو عاوز تعرف أنا نازل بكره أطلب أيه يبقي شوف الفيديو دا

الموضوع مش عاوز كلام كتير غير أنك تثق فيا ولو حصل حاجه لا قدر الله مش تمام أعرف أنه حد أندس يبوظ اليوم وأخيرا بس أعرف ان المجلس العسكري مش فوق الأنتقاض والمسأله من الشعب “أكيد انت مش عاوز تخلق ديكتاتور تاني” صح ؟

للتذكره والتاريخ

بيان الأخوان عن يوم 27 مايو

http://www.elfagr.org/dailyPortal_NewsDetails.aspx?nwsId=9929&secid=1

رد فعل الأخوان عن يوم 25 يناير

http://www.youm7.com/News.asp?NewsID=342107

والسلام ختام

في أمر المسيحيه في مصر-ج1

الأول خلينا نتفق ان المسيحيين في مصر مش أقليه بغض النظر عن التقديرات الرسميه اللي بتقول ان نسبتهم من سكان مصر هي 6% والكنيسه بتقول انها حوالي 15% يعني في المتوسط من 8% ل 10% والأمر التاني ان المسيحيين هما عنصر الأمه التاني الموجود وان امر الدوله لا يستقم في وضعه الحالي الا بتمكينهم من حيث الحقوق و الواجبات..عندك أعتراض ومش موافق علي الأستهلاله ؟ يبقي ماتكملش قرايه لأن اللي فيها مش حيعجبك

تعريف الأقليه “أحد التعريفات” كالتالي

الأقلية هي جماعة من الأفراد الذين يتميزون عن بقية أفراد المجتمع عرقياً أو قومياً أو دينياً أو لغوياً، وهم يعانون من نقص نسبي في القوة، ومن ثم، يخضعون لبعض أنواع الاستعباد والاضطهاد والمعاملة التمييزية

هنا التمييز المذكور سابقا حيكون علي أساس ديني لأانهم يدينون بالمسيحيه ,طيب هل بقي هما فعلا أقليه ؟

أزاي 6% او 10% مش أقليه ؟ كلام مش منطقي

لأ كلام منطقي جدا لو أفترضنا جدلا انه 10%(مع ان المفروض يبقي في ارقام معلنه مش لازم اخمن و افترض) يعني بحسبه بسيطه في حوالي  8.5 “أو أقل” مليون مسيحي في البلد ولما تعرف ان عدد سكان القاهره الدائمين هو 8 مليون يعني انا كدا مش بتكلم علي أقليه من حيث التعداد

الكلام اللي جاي ممكن مايعجبكش علشان بتقول ما انا مش شايفه في الحقيقه بس الحقيقه بتقول ان الدوله ما كانتش بتمارس اي نوع من الأضهاد اللمنهج ضد المسيحيين و منصوص عليه في قانون و دستور البلد واذا كان مابيتنفذش يبقي حندور علي طريقه سوا علشان نطبقه

يعانون من نقص نسبي في القوه ؟

في الدوله المدنيه القوه الوحيده فيها بتكون مملوكه للدوله وهي قوه القانون التي تطبق علي جميع أفراد الشعب بدون تمييز ما بين طوائفه يعني مش المفروض يكون المسلم مثلا بيمتلك سلاح بيدافع فيع عن نفسه والمسيحي لأ لأن الدفاع هو حق المواطن علي الدوله.

فأذا كانت القوه المقصوده هي السلاح فا ترخيص السلاح مابيطلعش علي اساس ديني مثلا كما ان الدفاع عن الارض والنفس هو من واجبات الدوله للأفراد بغض النظر عن الدين بمعني ان لو الحرب قامت ادوله مش حتسلح المسلمين وتقولهم اطلعوا حاربوا وبالنسبه للمسيحيين معاكو ربنا بقي

قوه الفلوس: مافيش اي قيود بتوضع من الدوله علي تجاره المسيحي في مقابل تسهيل الاحتكار للمسلم بالعكس انت ممكن تلاقي نشاطات أقتصاديه المسيحيين مميزين فيها عن المسلمين في البلد من 300 سنه زي تجاره الدهب مثلا هل صدر قانون يجرم أحتكار المسيحيين هذه التجاره حقولك لأ

أكيد في مصر مش بيسألو المسيحي من اين لك هذا علي أساس دينه وبعدين انت عمرك رحت البنك تودع فلوس قالولك انت يا جورج مالكش الحق تحط فلوس عندنا ؟

المسيحي له الحق في التجاره والتعليم وزياره دور العباده والتعبد في الأوقات التي تناسب عقيدته والدوله ملزمه بأجازات اعياده له كمان الحق في التعليم والصحه والمستشفيات والتأمين الصحي والتملك وحريه الحركه والتنقل وحريه الأتصالات

    المناصب العليا والمشاهير: عائله بطرس غالي – مكرم عبيد –نجيب الريحاني – هاني رمزي وهشام عبدالرسول لاعبي الكره وكمل انت بقي

كل اللي فات بس علشان اثبت ان المسيحين مش أقليه ولا مضطهدين بشكل ممنهج في البلد..صدقت ولا عاوز تاني ؟

ممكن علشان الصوره توضح حتبقي محتاج تقرا عن الأضطهاد الممنهج والتصفيات العرقيه وممكن مثلا تقرا عن أقليم الأيجور في الصين ومجازر الأرمن في 1915

ممكن زووم أوت ونعرف ايه المشكله

  أنا قناعاتي الشخصيه بتقول ان مافيش أضطهاد وأفتكر كتير من المسيحين بيشاركوني الاعتقاد دا بس ممكن نقول في شويه أحتقان ورواسب بتطلع علي السطح كل فتره نتيجه عدم فهم الأخر ..المسلمين عايشين بمنطق الأكثريه والغلبه في البلد فبقي هو سي السيد المسيحيين حسوا ان مالهمش مكان في اخر 40 سنه مثلا فا محلش مشكلته لاكن زود الطين بله وأنطوي علي نفسه (الطرفين مقضينها رنات بدل الكلام).

الغريب اني صراحه بلوم علي المسيحيين بشكل أكبر بس نقطه الأنطواء ممكن حد يقولي احنا كان لازم نعمل كدا علشان شوفنا سياسه البلد بتدي مساحه أكبر للأسلاميين علشان ياكلو التيارات اليساريه التانيه أبتداء من عصر السادات طيب انت كان فين تأثيرك ووجودك علشان ترد ؟ ممكن تعرف تفاصيل أكتر من هنا

نيجي للمهم: علشان أستتباب اي نظام قمعي في الدنيا لازم بتكون في أدوات زي قمع حريه التعبير مثلا بس الأهم في موضوعنا هو بطش الأمن..في الثمانينات والتسعينات ظهر الأرهاب المتأسلم بتاع الجماعات الجهاديه وكان لازم يبقي فيه سطوه أمن وقانون طوارئ والأسم احنا بنحمي الناس من الأرهاب ولأن ماينفعش ان بلد تتنيها تحت الارهاب طول السنين دي كلها فا كان لازم يبقي فيه فزاعه تانيه خاصه ان جذورها موجوده مانتش محتاج نخنرع حاجه جديده وتكون دخيله وهي الفتنه الطائفيه.

لحظه واحده..انت بتتهم النظام بأشعال الفتنه الطائفيه ؟ الأجابه: طبعا

بصوره مباشره بالتحريض والتنفيذ او بصوره غير مباشره بالتطنيش لجذور المشكله او تركه الأرهابيين يتحركوا تحت سمعه وبصره أو بالطرق العقيمه لحل المشكله أبتداء من مسلم ومسيحي ايد واحده وقعدات العرب بدون تنفيذ القانون

عندنا مشاكل واضحه ومحتاجه لحلول وألي اثق انها حتحل المشكله من جذورها بس علشان نكون عقلانيين حتاخد وقت بس تستاهل..حلول من نوعيه برامج التعليم والتثقيف الجديد..المشاركه بناء في وطن واحد..خطاب ديني حديث..عداله بغض النظر عن الديانه. الحلول حنقشها بستفاضه في الجزء التاني من البوست

الله..الوطن..البروليتاريا

عن المصالحه نتحدث

عن المصالحه مابين فتح و حماس نتحدث بأختصار

أستهلاله تاريخيه: لم أقراء في تاريخ مصر عن اي عصر من العصور الا وكانت البوابه الشرقيه هي محور أهتمام وقلق الحاكم وكأنها مصدر الشر الذي يتهدد امنها , ارض سيناء تشهد بمن مروا بها للدفاع عن أرض او مقابله عدو قبل دخوله الارض

الحقيقه ما كنتش متفائل اوي يعني بحوار فتح وحماس هنا في مصرلأنه بأختصار نفس السيناريو اللي بنتفرج عليه  من 2007 لما دب الخلاف وحرب الشوارع مابين فصيلين البلد الواحد او كما أحب ان أسميه الأخوه الاعداء وطبعا فاكرين كويس جدا  ان نشره الأخبار كانت دائما وأبدا تحتوي علي خبر وصول وفدين من الفصيلين الي القاهره لجوله من جولات الحوار الوطني التي كانت تتم تحت رعايه المخابرات المصريه و الوزير (علي اساس اننا مش عارفين انه رائيس المخابرات العامه المصريه)عمرو سليمان

نبذه سريعه عن الخلاف: في الأنتخابات التشريعيه في عام 2005 نجحت حماس بأغلبيه كاسحه حركه فتح ومن هنا هي اللي شكلت الحكومه الفلسطينيه طبعا حماس بشئ من الأمانه والكثير من  الخبث”والله اعلم” أستغلت الموقف وكشفت للعالم عن حجم السرقات والنهب المنظم من كبار رجال فتح ل المنح و المساعدات العالميه للشعب المطحون في النص وطبعا فتح ماسكتتش خاصه بعد ضياع السلطه منهم فجرت حماس لصراع مسلح دام لعده أيام في يونيو 2007 ومات فلسطينين كثر وناخد بالنا من مسلح دي لأن الغريب ان الفصيلتين مسلحتين وهو مايناقض بناء دوله مدنيه والأدهي من ذلك لم نري السلاحين معا في وجه اسرائيل”و “

المهم يوم الأربع اللي فات 27 أبريل حصل تفاهم حول الخطوط العريضه لمذكره تفاهم وطني مابين فتح و حماس بعد يوم واحد فقط من المفاوضات !!المهم هنا بيت القصيد لماذا غير متفائل ؟

أضغط للتكبير

Agreements1 

كدا السبب الاول وضح وهو ان الاتفاقات والتفاهمات السابقه لم يكتب لها ابدا الاستمراريه او حتي العمل بها..للتوضيح اكثر الوثيقه السابقه كانت في فبراير 2007 وتنص علي تحريم الدم الفلسطيني ولكن يبدو ان هناك شرط مبهم وهمو تن يكون التحريم لمده 6 أشهر فقط علي ان يعود القتال المسلح في يونيو

هل اسرائيل وأمريكا ستترك الحال ينصلح ؟ اكيد لا Devil 

الأهم من ذلك هو الأختلاف الأيدولوجي مابين الحركتين والذي لا يعقل الاتفاق الدائم ابدا علي هذه الخلفيه..حماس “حركه مقاومه أسلاميه” ومن الواضح من الاسم المختصر انها جماعه جهاديه مبنيه علي فكر أصولي وهو فكر الأخوان المسلمين تري انه لا هدنه مع الكيان المحتل وان المقاومه هو واجبها وعزها اما فتح “ حركه تحرير فلسطين” التي اعترفت بأسرائيل دوله الجوار مع اتفاق أوسلو 1993 فالحركه لاتري غضاضه في التعايش مع الجار او المغتصب وهي التي تتبني الفكر العلماني وعلي حد ما قرأت اليسار الوسط

طيب مافيش أمل ؟

لا ممكن بس لا يمكن ان نفرط في هذا الأمل والا كنا بنحلم..الأمل الوحيد ان يتفق الفصيلان علي ان مصلحه الفلسطينين هي اولي الأولويات وانت تقدم علي مصالحهم الشخصيه

Follow

Get every new post delivered to your Inbox.

%d bloggers like this: